12 July 2010

ဆေးတက္ကသိုလ်(၁)ရန်ကုန် ပြောင်းရွှေ့ဖွင့်လှစ်ရန် တရားဝင် ညွှန်ကြားထားခြင်း မရှိသေးကြောင်း ပါမောက္ခချုပ် ပြောကြား


ရန်ကုန်တိုင်း လမ်းမတော်နှင့် ပြည်လမ်းရှိ ဖွင့်လှစ်သင်ကြားလျက်ရှိသော ဆေးတက္ကသိုလ်(၁) ရန်ကုန် အား ပြောင်းရွှေ့ဖွင့်လှစ်သွားမည် ဆိုသည်မှာမဟုတ်ကြောင်း အဆိုပါ ဆေးတက္ကသိုလ်၏ ပါမောက္ခချုပ် ဖြစ်သူ ဒေါက်တာဖေသက်ခင်က ပြောကြားခဲ့သည်။


ပြင်ပတွင် ဆေးတက္ကသိုလ်(၁) ရန်ကုန်အားပြောင်းရွှေ့မည်ဆိုသည့် သတင်းမှာ ကောလာဟလသတင်းများ ထွက်ပေါ်နေပြီး ယင်းသတင်းမှာ မှန်ကန်မှုမရှိကြောင်းနှင့် သက်ဆိုင်ရာ တာဝန်ရှိသူများမှာလည်း ပြောင်း ရွှေ့မှုနှင့်ပတ်သက်၍ ညွှန်ကြားချက် တစ်စုံတစ်ရာမရှိသေးကြောင်း ဆေးတက္ကသိုလ်မှ ပါမောက္ခချုပ်က ပြောကြားခဲ့သည်။


'အခု တော်တော်များများ ပြောနေကြပါတယ်။ ကျွန်တော့်ရဲ့ ဆေးတက္ကသိုလ်(၁) ရန်ကုန် ပြောင်းရွှေ့မယ်ဆိုတာ လုံးဝမဟုတ်ပါဘူး။ အခုချိန်ထိ ကျွန်တော့်ဆီကို သက်ဆိုင်ရာ ၀န်ကြီးဌာနကနေ တရားဝင် ညွှန်ကြားချက် ဘာမှမပေးသေးဘူး။ ပညာရေးအဖွဲ့အနေနဲ့လည်း ဘာမှ မသိရသေးပါဘူး'ဟု ဆေးတက္ကသိုလ်(၁) ရန်ကုန်မှပါမောက္ခချုပ် ဒေါက်တာ ဖေသက်ခင်က ပြောကြားခဲ့သည်။


ဆက်လက်၍ ဆေးတက္ကသိုလ်(၁) ရန်ကုန်မှ တာဝန်ရှိသူတစ်ဦးကလည်း 'ပြောင်းရွှေ့မယ်ဆိုတာ လုံးဝမဟုတ်ပါဘူး။ အခုအချိန်မှာလည်း ဆေးတက္ကသိုလ်ဝင်းထဲမှာ ဆိုင်ခန်းတွေ ဖွင့်လှစ်ရောင်းချဖို့ ချိပ်ပိတ်တင်ဒါ တွေခေါ်ယူနေပါတယ်။ ယိုမျိုးစုံဆိုင်၊ စာရေးကိရိယာ၊ ကွန်ပျူတာ နှင့်မိတ္တူဆိုင်၊ မြန်မာမုန့်မျိုးစုံဆိုင် တွေဖြစ်ပါတယ်။ ဖွင့်လှစ်ရောင်းချမယ့် ဆိုင်ပိုင်ရှင်တွေအနေနဲ့ကလည်း မူးယစ်စေတတ်တဲ့ ဘီယာ၊ ခေါင်ရည်၊ ဆေးလိပ်နဲ့ ကွမ်းယာတွေ မရောင်းရဘူး။ နောက်ပြီးအဖွဲ့က သတ်မှတ်ထားတဲ့ ဈေးနှုန်းအတိုင်း ရောင်းချရမယ်။ ပြင်ပပေါက်ဈေး ထက်လည်း ပိုပြီးရောင်းချခွင့်မပြုပါဘူး'ဟု ပြောကြားခဲ့သည်။


ယခုလက်ရှိကာလ၌ ဆေးတက္ကသိုလ်(၁) ရန်ကုန်တွင် ဘွဲ့လွန် ကျောင်းသားကျောင်းသူဦးရေ ၄၀၀ ကျော်နှင့် ဘွဲ့ကြို ကျောင်းသား ကျောင်းသူဦးရေ ၃၀၀၀ ကျော် တက်ရောက် ပညာသင်ကြားနေကြောင်း သိရှိရသည်။


ဆေးတက္ကသိုလ်(၁) ရန်ကုန်မှာ ၁၉၂၃-၁၉၂၄ ခုနှစ်က ရန်ကုန်ဆေး ကောလိပ်အဖြစ် စတင်ဖွင့်လှစ်ခဲ့ပြီး ဖွင့်လှစ်စက ကျောင်းသား ၄၀ ကျော် ရွေးချယ်ခံရသော်လည်း မြန်မာ ကျောင်းသား ၁၀ ဦးသာ ပါဝင်ခဲ့ ကြောင်းသိရသည်။ ကျန်ကျောင်းသားများမှာ ပန်ချာပီ၊ ဘင်္ဂါလီနှင့် အခြားသော ကပြားများဖြစ်သည်။ ဆေးကျောင်းသားများမှာ ဆေးဝိဇ္ဇာ ဘွဲ့(M.B.,B.S)ရရှိရေးအတွက် ဥပစာ သိပ္ပံအောင်မြင်ပြီး ခြောက်နှစ်ဆက် တိုက်ပညာသင်ကြားရသည်။ ယင်း သို့ပညာသင်ကြားဆဲကာလအတွင်း ၁၉၂၇ ခုနှစ် ဖေဖော်ဝါရီလ ၂ ရက် နေ့တွင် ဆေးကောလိပ်အဆောက် အအုံသစ်ကို မြန်မာပြည်ဘုရင်ခံ ဆာဟာကုတ်ဘတ္တလာက ပန္နက် ရုိုက်ပေးခဲ့သည်။ ၁၉၂၉ ခုနှစ် နှစ်ကုန်ပိုင်းတွင် အဆောက်အအုံသစ် ပြီးစီးခဲ့ရာ ဆေးကောလိပ်ပထမအသုတ် ကျောင်းသားများအဖို့ နောက်ဆုံးနှစ် မီရုံမျှသာရှိခဲ့သည်။ ဆေးကောလိပ် ကျောင်းသား ၄၀ ကျော်မှာ ၁၉၂၉ ခုနှစ် နောက်ဆုံးနှစ်၌ ၁၂ ဦးသာ ကျန်ရှိပြီး ကိုးဦး စာမေးပွဲအောင်မြင်ခဲ့ကြောင်း သိရှိရသည်။ အောင်မြင်ခဲ့သူများတွင် မြန်မာလူမျိုး ငါးဦး ပါဝင်ခဲ့ကြောင်း ကို eleven ဂျာနယ်တွင် ဖော်ပြထားပါသည်.။