01 March 2010

အရည်ပျော်ပီတိ ..




ရန်ကုန်တိုင်း မင်္ဂလာတောင်ညွန့်မြို့နယ်ရှိ ကြက်ဘဲဈေးမှအထွက် ဂိတ်ဝတွင် အနားသို့ ရောက်လာသောသူ တဦးကြောင့် ရင်ထဲ ထိတ်ကနဲ ဖြစ်သွားသည်။

အနားသို့ရောက်လာပြီး လက်ပြတားလိုက်သူက စည်ပင်ဝတ်စုံ အပြာရောင်ဝတ်ထားသူ လူငယ်တဦး။

“အကို .. ခုနက ဈေးထဲမှာ ဓာတ်ပုံရိုက်လိုက်တာ ကျနော်တို့ တွေ့လိုက်ပါတယ်။ ခဏလောက် လိုက်ခဲ့ပါဦး”

“ကျနော် ဘယ်မှာ ရိုက်လို့လဲ။ ကျနော့် လက်ထဲမှာ ကိုင်ထားတာ MP3 Player ပါ”

“အဲလို ကင်မရာအသေးလေးတွေ ကျနော်တို့စာစောင်တွေထဲမှာ တွေ့ဖူးပါတယ်။ အဲမှာ တီဗီပုံလေးနဲ့။ ကဲ .. ဒါတွေ နောက်မှရှင်းပါ။ လောလောဆယ် ဈေးရုံးခန်း လိုက်ခဲ့ပါဦး”

MP3 ပေါ်က menu ခလုတ်လေးကို သူက တီဗီအမှတ်အသားဟု ယူဆနေသဖြင့် ရယ်လည်း ရယ်ချင်နေမိသည်။ သို့ရာတွင် ကျနော် ဘယ်လိုမှ ရှင်းလို့ရမည်မဟုတ်မှန်း သိလိုက်ပြီ။ မတတ်နိုင်တော့။ လိုက်သွားရုံသာ ရှိတော့သည်။ ဓာတ်ပုံရိုက်ခဲ့တာတော့ အမှန်ပင် ဖြစ်သည်။

ကျနော်ရိုက်ရသည့်အကြောင်းက ကြက်ငှက်တုပ်ကွေး ဖြစ်ပွားနေချိန်တွင် ဈေးထဲ၌ ဘယ်လောက်ထိ အန္တရာယ်ကင်းရှင်းရေး ဆောင်ရွက်ထားလဲ သိရဖို့ ဖြစ်သည်။ ကြက်သတ်သည့်သူတွေက ဘာမှမသိကြ၊ လက်ဗလာနှင့်၊ ကျနော်လိုချင်သော ပုံလေးတွေတော့ရပြီ။ ဒါပေမဲ့ အခုလို ဖြစ်လာတော့ ကင်မရာကို ကျနော် အင်္ကျီအောက်တွင် ထည့်ထားသည်။ ရုံးခန်းသို့အသွား ကင်မရာကို ဘယ်လိုဖွက်ရမလဲ အပြေးအလွှား ခေါင်းထဲမှာ စဉ်းစားနေမိသည်။ ကံကောင်းချင်တော့ ကျနော့်ကို ရုံးခန်းခေါ်ရာတွင် သူတို့က နောက်ကပဲ လိုက်လာသည့်အတွက် ပုဆိုးပြင်ဝတ်သလိုနှင့် ကင်မရာကို အတွင်းခံဘောင်းဘီထဲ တဖြည်းဖြည်း ထိုးသွင်းလာခဲ့သည်။

ဈေးရုံးခန်းထဲရောက်တော့ တာဝန်ရှိသူက ကျနော့်ကို ဘယ်ဂျာနယ်ကလဲမေးတော့ ကျနော်က ဂျာနယ်က မဟုတ်၊ ကြက်သားဝယ်ဖို့ ဖြစ်ကြောင်းနှင့် မိမိ MP3 နှင့် သီချင်းနားထောင်နေစဉ် တာဝန်ရှိသူက ကင်မရာနှင့် ရိုက်သည်ဟု ထင်မြင်ယူဆခြင်းသာဖြစ်ကြောင်း ပြောပြလိုက်သည်။ ထိုပုဂ္ဂိုလ်က MP3 ကို စစ်ဆေးပြီးနောက် ကျနော့်အိတ်နှင့် ခန္ဓာကိုယ်အား ရှာဖွေရန် ကျနော့်ကို ခွင့်တောင်းသည်။ ဘယ်လိုလုပ်ရမလဲ။ အမှန်အတိုင်း ဖွင့်ပြောရရင် ကောင်းမလား။ အို .. ရှုပ်တယ်။ ဘူးခံတာပဲ ကောင်းတယ်။ တွေ့တော့လည်း ကြည့်ရှင်းရတာပေါ့ဟု တွေးနေမိသည်။ တွေ့သွားရင်ကော .. ဘယ်သူက လိုက်ရှင်းပေးမည်လဲ… အမှန်တော့ ကျနော်တို့သည် ဂျာနယ်မှ သတင်းထောက် မဟုတ်သဖြင့် မည်သူကမှ လိုက်ရှင်းပေးမည်မဟုတ်။ မိမိ မိခင်ဌာနက တိုင်းတပါးမှာ။ သူတို့လည်း ဘာမှတတ်နိုင်မည်မဟုတ်။ ကိုယ့်အန္တရာယ်ကို ကြည့်ရှောင်၊ ကိုယ်ဖြစ် ကိုယ်ခံပင်။

တာဝန်ရှိသူက ကျနော့်ကို ရှာဖွေပြီး ဘာမှမတွေ့သဖြင့် အသာတကြည် သွားခွင့်ပြုတော့မှ သက်ပြင်းချနိုင်တော့သည်။

ဒါက မြန်မာနိုင်ငံက သတင်းထောက်တွေ သတင်းဓာတ်ပုံ ယူရသည့် အခြေအနေပင်။ ဒါတောင် ပညာပေး သတင်းယူသည့် ကိစ္စပဲ ရှိသေးသည်။ ဆန္ဒပြသတင်းတို့၊ ဘာတို့ဆိုလျှင် မည်မျှခက်ခဲမည်ကို စဉ်းစားကြည့်ယုံဖြင့် သိနိုင်ပေသည်။ သတင်းတွေကတော့ ရှိနေပါသည်။ သို့ရာတွင် ဓာတ်ပုံ၊ ဗီဒီယို သတင်းထောက်တဦးအဖို့ ထိုသတင်းဓာတ်ပုံရိုက်ယူရေးကမူ အင်မတန် သတိထားရသည်။ နိုင်ငံခြားမှာလို မိမိဘယ်သတင်းဌာနကပါလို့ သွားပြော၍မဖြစ်။ သတင်းထောက်ဆိုသည်နှင့် အမေးခံရမည့် သာမန်လူတဦးဆိုလျှင် တွန့်သွားသည်။ မေးခံရမည့်သူက သတင်းပေး ဖြစ်နေလို့ကတော့ ..။

အခက်အခဲကြားမှ သတင်းဓာတ်ပုံ ဗီဒီယိုရိုက်ယူနိုင်ခဲ့ပြီဆိုလျှင် ပျော်မဆုံးတော့။ သို့သော် အပြီးအပြတ် ပျော်လို့မရသေး။ ထိုသတင်းကို မိမိသတင်းဌာနသို့ ရောက်အောင် ပို့ရဦးမည်။

မိမိတို့မှာ ကိုယ်ပိုင်အင်တာနက် မရှိ။ ဒီ့အတွက် အင်တာနက် ကဖေးဆိုင်ကို ပြေးရသည်။ ဆိုင်ရောက်သည်နှင့် အရင်ဆုံး ဆိုင်ထဲကို မျက်စိတချက် ဝေ့ကြည့်လိုက်ရသည်။ လူစိမ်းလား၊ အမြဲသုံးနေကျ တွေ့နေကျတွေလား ဆိုတာ ဖျတ်ကနဲ ကြည့်ရုံဖြင့် အကျင့်ရနေပြီးသား။ ပို့ချင်ဇောနှင့် ဘေးဘီမကြည့်လို့ကတော့ မိမိဘေးခုံက သူသည် ထောက်လှမ်းရေးလည်း ဖြစ်နိုင်သည်။ သတင်းပေးသမားလည်း ဖြစ်နေနိုင်သည်။ ဘယ်အချိန်များ ”ဒီက ညီအကို ခဏ” လို့ လာခေါ်မလည်း ထိတ်နေရသည်။ အဲဒီခဏကလည်း ဒီခေတ်အင်တာနက် ဥပဒေဆိုတာကြီးနှင့်ဆိုလျှင် ဒီ့ပြင်ပုဒ်မတွေမပါသေးဘဲ ၁၅ နှစ် ဖြစ်နေသည်။ အိုကေပြီ၊ ဘေးဘီရှင်းပြီ၊ စိတ်ချရပြီဆိုလျှင် memory card ထုတ်၊ လုပ်ငန်း စရပြီ။

မိမိတို့မှာ ဖြတ်တောက်ရမည်၊ ဖိုင်ဆိုဒ်ချုံ့ရဦးမည်။ ဒါတွေအတွက် လိုချင်သည့် ဆော့ဝဲတွေက ဆိုင်တိုင်းမှာ မရှိ။ ဒီတော့ ကိုယ်ပိုင် thumbright ထဲမှာ download လုပ်ပြီး အကုန်သိုမှီးထားရသည်။ ပြီးမှ ဖန်သားပြင်ပေါ်တင်ပြီး လိုရာပြောင်းရသည်။
အင်တာနက်ဆိုင်တွေမှာက ပြင်ပဝဘ်ဆိုဒ်တွေ၊ သတင်းတွေ ဖွင့်ကြည့်ခွင့် မရှိ။ ဒီအတွက် proxy နံပါတ်တွေခံပြီး ကျော်ကြည့်ရသည်။ ကြည့်တာကလည်း အေးဆေးကြည့်၍မရ။ ညောင်သီးလည်း စား၊ လေးညှို့သံလည်း နားစွင့်နေရသည်။ မဟုတ်လို့ကတော့ ၁၅ နှစ် ဖြစ်သွားမည်။ မြန်မာပြည်မှာက အိမ်မှာ ဓာတ်ခဲလေး နှစ်လုံး၊ မီတာတိုင်းသည့် ကိရိယာလေးရှိရုံမျှနှင့် အမြင်မကြည်လျှင် ဖောက်ခွဲရေးသမားဆိုပြီး တံဆိပ်ကပ်ခံရနိုင်သည်။

ကဲ .. ပြောင်းလည်း ပြောင်းပြီးပြီ၊ upload လုပ်သည့် ဆိုဒ်တွေနဲ့ ပို့တော့မည်ဆိုမှ အင်တာနက် ကွန်နက်ရှင်က ကျသွားပြန်သည့် အဖြစ်တွေကလည်း မကြာခဏ။ နာရီဝက်နှင့် ပြီးရမည့်ဟာက ၁ နာရီလည်း ဖြစ်သွားနိုင်သည်၊ ၂ နာရီလည်း ဖြစ်သွားနိုင်သည်။ ကြာမှသာ ကြာစေတော့။ သတင်းကို အချိန်မီ တင်နိုင်ဖို့ အရေးကြီးသည်။ အားလုံး အဆင်ပြေပြီ၊ ပို့ချင်ရာလည်း ပို့ပြီးပြီဆိုမှ ကွန်ပြူတာ ဖန်သားပြင်တွင် အကုန်ရှင်းခဲ့ရသည်။ မေ့မကျန်ရင် အကောင်းဆုံးသာ။

နောက်တနေ့ ကိုယ့်ဌာနရဲ့ ဝဘ်ဆိုဒ်မှာ ကိုယ့်သတင်း ပါလာပြီဆိုလျှင် ကြည်နူးနေရသည်။ ဗီဒီယို သတင်းထောက်ဆိုလျှင်တော့ တမိနစ်ခန့် သတင်းတိုလေးကို ပီတိအပြည့်ဖြင့် ခံစားရန်ရင်ခုန်စွာ စောင့်ဆိုင်းနေရသည်။ မိမိရိုက်ကူးသည့် သတင်းသည် အယ်ဂျာဇီးယားတို့၊ စီအန်အန်တို့မှာပါ ပါလာလျှင် လူမသိသူမသိ ကျိတ်ဝမ်းသာရသည်။

ဒီနေ့တော့ အခက်အခဲကြားထဲက ရိုက်လာသည့် ကြက်ငှက်တုပ်ကွေး သတင်းလေးကို ကြည့်ရန် တီဗီရှေ့ စောင့်နေမိသည်။ လာတော့မည်။

ဖျတ်ကနဲအလင်းဓာတ်များ ကွယ်ပျောက်သွားသည့်နှင့်အတူ ''ဟာ'' ဟု ညီးညူမိလိုက်သည်။ သွားပြီ။ မီးပျက်သွားချေပြီ။ နောက်နေ့မှ သူများတွေ ပြောသံကြားလျှင် တကိုယ်တည်း ကျိတ်၍ ပီတိဖြစ်ရပေတော့မည်။

ကြည်စင်သော်တာ

ရင်းမြစ် မဇ္ဈိမ