၂၃ နှစ်နီးပါး ၀င်ငွေခွန် ကင်းလွတ်ခွင့် ရရှိထားသော ဦးပိုင်လီမိတက်သည်လည်း အခွန် ပေးဆောင်ရတော့မည်ဟု သိရသည်။ ၁၉၉၀ ခုနှစ် ဧပြီလ ၄ ရက်နေ့တွင် စတင်ဖွဲ့စည်းခဲ့သော ဦးပိုင်လီမိတက်မှာ ကုန်သွယ်လုပ်ငန်းခွန်ကို ၂၀၁၂ ခုနှစ် ဧပြီ ၁ ရက်နေ့တွင်မှ စတင်ပေးဆောင်ခဲ့ရာ ကျန်ရှိနေသေးသော ၀င်ငွေခွန်ကိုပါ ပေးဆောင်ရတော့မည်ဟု ဘဏ္ဍာရေးနှင့် အခွန်ဝန်ကြီးဌာန ပြည်ထောင်စုဝန်ကြီး ဦးဝင်းရှိန်၏ ပြောကြားချက်အရ သိရသည်။ “ဘယ်သူမဆို နိုင်ငံသားတိုင်း ပေးဆောင်ရမယ့် အခွန်တွေကို ပေးဆောင်ရဖို့ တာဝန်ရှိပါတယ်။ ဒါကြောင့် ဦးပိုင် ကိစ္စကလည်း ပါသွားပါတယ်” ဟု ပြည်ထောင်စုဝန်ကြီးက ပြောသည်။ ကုန်သည်/စက်မှုမှ စီးပွားရေး လုပ်ငန်းရှင်ကြီး တစ်ဦးက “မည်သူမဆို ရရှိတဲ့ အမြတ်ဝင်ငွေခွန်ထဲက ၂၅ ရာခိုင်နှုန်းကို ပေးဆောင်ရတယ်။ ဒါက ဘယ်သူ့အတွက်လည်း သန်း ၆၀ ကျော်သော ပြည်သူ့အတွက် သုံးတာလေ။ ဒါဆို ပေးသင့်လား၊ မပေးသင့်ဘူးလား ဆိုတာ ရှင်းနေတာပဲ” ဟု ပြောသည်။ စီးပွားရေး ဦးပိုင်လီမိတက်ကို လက်ရှိ တာဝန်ထမ်းဆောင်နေသော တပ်မတော်သားများ၊ အငြိမ်းစား တပ်မတော်သားများနှင့် မိသားစုဝင်များ၏ ထည့်ဝင်ငွေများဖြင့် လုပ်ကိုင်နေကြောင်း လွှတ်တော်အစည်းအဝေး တစ်ခုတွင် တပ်မတော် ထိပ်ပိုင်း ခေါင်းဆောင်တစ်ဦးက ပြောကြားခဲ့သည်။ ဦးပိုင်လီမိတက်သည် သွင်းကုန်ထုတ်ကုန် လုပ်ငန်းများ၊ သတ္တုတူးဖော်ရေး လုပ်ငန်းများ၊ သယ်ယူပို့ဆောင်ရေး လုပ်ငန်းများ၊ ၀န်ဆောင်မှု လုပ်ငန်းများ၊ အချိုရည်နှင့် ယမကာ လုပ်ငန်းများ အပါအ၀င် မြန်မာနိုင်ငံ၏ အဓိက စီးပွားရေးလုပ်ငန်း အများစုကို လုပ်ကိုင်လျက်ရှိပြီး တပ်မတော်အစိုးရ လက်ထက်ကာလတွင် နိုင်ငံ၏ အရပ်ရပ် စီးပွားရေး လုပ်ငန်းများကို ဦးဆောင် လုပ်ကိုင်ခဲ့သည်။ လက်ရှိတွင် ဦးပိုင်လီမိတက် ဥက္ကဋ္ဌအဖြစ် ဗိုလ်ချုပ်ခင်ဇော်ဦး (စစ်ရေးချုပ်) က တာဝန်ယူထားပြီး ၎င်းသည် ၂၀၁၀ ခုနှစ်က ဥက္ကဋ္ဌရာထူးကို လက်ခံခဲ့သည်ဟု Popular News ဂျာနယ်တွင် ဖော်ပြထားပါသည်။
