05 August 2010

နအဖစစ်အာဏာရှင် ကြီးဦးသန်းရွှေ ရန်ကုန်တွင် ဆေးကုသမှုခံယူ


ပြီးခဲ့သည့်လက အိန္ဒိယ ၀န်ကြီးချုပ် မာမိုဟမ်ဆင်းနှင့် တွေ့ရသော ဗိုလ်ချုပ်မှူးကြီး သန်းရွှေ (ဓာတ်ပုံ - AP)


တပ်ချုပ်ကြီးဟု အများခေါ်ဆိုကြသည့် နအဖ အစိုးရခေါင်းဆောင် ဗိုလ်ချုပ်မှူးကြီး သန်းရွှေ ရန်ကုန်မြို့ ပန်းလှိုင် ဆေးရုံတွင် တစ်ရက်တာ ဆေးကုသမှုခံယူခဲ့သည် ဟု ဆေးရုံနှင့် နီးစပ်သည့် အမည် မဖော်လိုသူ တဦးက ပြောဆိုသည်။

ရုတ်တရက် မကျန်းမာသဖြင့် ခေတ္တ ဆေးကုသမှု ခံယူခြင်းလား၊ သို့မဟုတ် ကျန်းမာရေး စစ်ဆေးရန် လိုအပ်သဖြင့် မြန်မာနိုင်ငံတွင် ဆေးကုသမှု ပစ္စည်းကိရိယာ စုံလင်သည့် ပုဂ္ဂလိကပိုင် ပန်းလှိုင်ဆေးရုံတွင် တက်ရောက်ခြင်းလား ဆိုသည်ကို ရှင်းလင်းစွာ မသိရှိရသေးပေ။

ပန်းလှိုင်ဆေးရုံသည်။ မြန်မာနိုင်ငံတွင် မွေးဖွားပြီး ဟောင်ကောင်နိုင်ငံသား ခံယူထားသူ ဆာ့ဂျပန်း ပိုင်ဆိုင်သည့် ဆေးရုံဖြစ်ပြီး ရန်ကုန်တဖက်ကမ်း လှိုင်သာယာ မြို့နယ်တွင်တည်ရှိသည်။ ပြည်ပမှ အထူးကု ဆရာဝန်များ ရှိသည့် ရန်ကုန်မြို့ရှိ ကုသမှု စရိတ် အမြင့်ဆုံး ဆေးရုံတရုံလည်း ဖြစ်သည်။

အသက် ၇၇ နှစ် ရှိပြီဖြစ်သည့် နအဖ အစိုးရအဖွဲ့၏ အာဏာ အရှိဆုံး ခေါင်းဆောင် ဗိုလ်ချုပ်မှူးကြီး သန်းရွှေသည် လွန်ခဲ့သည့် သီတင်းပတ်အတွင်းကပင် အိန္ဒိယနိုင်ငံသို့ ၅ ရက်ကြာ ချစ်ကြည်ရေး ခရီး သွားရောက်ခဲ့သေးသည်။

သူ့၏ ကျန်းမာရေး အခြေအနေအပေါ် ပြည်တွင်း ပြည်ပမှ နိုင်ငံရေး လေ့လာသူ အကဲခတ်သူများက စိတ်ဝင်စားလျက် ရှိသည်။ နအဖ စစ်အစိုးရအဖွဲ့၏ အုပ်ချုပ်ပုံမှာ စုပေါင်း ခေါင်းဆောင်မှု မဟုတ်ဘဲ တဦး တယောက်၏ တသွေး တသံ အမိန့်ဖြင့် စီမံ ကွပ်ကဲနေသည့် အတွက် သူ့၏ ခေါင်းဆောင်မှုနေရာ လစ်လပ်သွားခြင်းက မြန်မာ့ဒီမိုကရေစီ လှုပ်ရှားမှုအပေါ်တွင် သက်ရောက်မည့် အကျိုးဆက်များကို လည်းကောင်း၊ မြန်မာ့ တပ်မတော်အတွင်း. အာဏာ ချိန်ခွင်လျှာ ပြောင်းလဲမှုဖြစ်ပေါ်နိုင်သည့် အချက်တို့ကို လည်းကောင်း စိတ်ဝင်စားနေကြသည်ဟု သိရသည်။

စစ်ထောက်လှမ်းရေးများ ဖြုတ်ထုတ်ခံရအပြီး ၂၀၀၅ ခုနှစ် နှစ်လယ် ရန်ကုန်မြို့၌ စစ်အစိုးရ ရုံးစိုက်စဉ်ကာလ အတွင်းကလည်း သူ၏ ကျန်းမာရေး အခြေအနေ မကောင်းသည့် သတင်းများ ထွက်ပေါ်ခဲ့ဖူးပြီး နအဖ စစ်အုပ်စု၏ ဒုခေါင်းဆောင်ဖြစ်သူ ဗိုလ်ချုပ်ကြီးမောင်အေးက အာဏာ သိမ်းလိုက်သည်ဆိုသည့် ကောလဟလများလည်း ထွက်ပေါ်ခဲ့ဖူးသည်။

ရင်းမြစ်..မိုးမခ

ပေးပို့ ပေးသော ကိုမောင်ရစ် အား ကျေးဇူး တင်ရှိပါသည်.။