ရခိုင်တွင် တိုင်းရင်းသားစည်းလုံးညီညွတ်ရေးပါတီ(တစည) ၂၀၁၀ရွေးကောက်ပွဲစည်းရုံးရေးလုပ်ငန်းများအင်တိုက် အားတိုက် ပြုလုပ် အာဏပိုင်များကဟန့်တားခြင်းမရှိ...။

တိုင်းရင်းသားစည်းလုံးညီညွတ်ရေးပါတီ(အတွင်းရေးမှူးဦးခင်မောင်ကြီး)

တိုင်းရင်းစည်းလုံးညီညွှတ်ရေး ပါတီမှ ရခိုင်ပြည်နယ်တွင် စည်းရုံးရေး လုပ်ငန်းများကို အင်တိုက်အားတိုက် ပြုလုပ်နေပြီ ဖြစ်သည်။

“ သူတို့ စည်းရုံးရေး လုပ်ငန်းတွေကို စတင်နေတာက တလကျော် နှစ်လ နီးပါး ရှိပြီ ထင်ပါတယ်။ စစ်တွေမှာ ဆိုရင် အုန်းတပင်၊ ဆင်ကူးလမ်း၊ ရွှေပြားနဲ့ နာဇီရွာ ရပ်ကွက်တွေကို ဆင်းပြီး ကြံ့ဖွတ်က လူတွေနဲ့ ပေါင်းပြီး စည်းရုံးရေး ဆင်းနေတာကို တွေ့ရပါတယ်” ဟု စစ်တွေမြို့ခံ တဦးက ပြောသည်။

တစည ပါတီမှ စည်းရုံးရေး ဆင်းသူများ အနေဖြင့် သူတို့ပါတီအား ထောက်ခံအောင် ငွေ၊ အ၀တ်အစားနှင့် ဆန်စသည်များကိုလည်း ဆင်းရဲသော ရပ်ကွက်များသို့ သွားရောက် လှူဒါန်းပြီး လူထုအား စည်းရုံး လုပ်နေသည်ဟု သူက ပြောသည်။

“ သူတို့က စည်းရုံးတဲ့ အခါ ဆင်းရဲတဲ့ ရပ်ကွက်တွေကို သွားပြီး ဆန်၊ အ၀တ်အစားနဲ့ ငွေတွေကို ထောက်ပံ့တဲ့ သဘောမျိုးပေးပြီး လှူဒါန်းတာ ဖြစ်ပါတယ်။ ပီးရင် တစည ပါတီကို ထောက်ခံကြဖို့ သူတို့ ပြောပါတယ်။ တစည ပါတီဆိုတာ တိုင်းပြည်ကို ဦးဆောင်ခဲ့တဲ့ ခေါင်းဆောင်တွေ အများအပြားပါဝင်တယ်။ သူတို့အာဏာ ပြန်ရရင် တိုင်းရင်းသား ပြည်သူတွေ အကျိုးကို ဆောင်ရွက်ပေးနိုင်တယ်ဆိုပီး ပြောပါတယ်။”

ယခုကဲ့သို့ စည်းရုံးရေး ဆင်းနေသော်လည်း တစည ပါတီကို ယခင် မဆလ ပါတီနှင့် ကောင်စီဝင်ဟောင်း မိသားစုများမှ အပ ပြည်သူလုထုများ ထောက်ခံမူကို မတွေ့ရကြောင်း သူက ပြောသည်။

“အများစုက မဆလ ပါတီဝင်ဟောင်းတွေဆိုတော့ လူထုက သူတို့ကို သိပ်ထောက်ခံတာ မတွေ့ရပါဘူး။ သူတို့ စည်းရုံးပေမယ့် ရခိုင်လူထုက သိပ်လိုလိုလားလား ရှိတာကို မတွေ့ရသေးပါဘူး။”

တစည ပါတီသည် ယခုအခါ ရခိုင်ပြည်နယ်၏ အဓိက မြို့များ ဖြစ်သော ကျောက်တော်၊ မြောက်ဦး၊ မင်းပြား၊ ကျောက်ဖြူ၊ ရသေ့တောင်၊ ဘူးသီးတောင်နှင့် မောင်တောမြို့နယ်တို့တွင် ရုံးခွဲများ ဖွင့်လှစ် လူပ်ရှားနေပြီး အထူးသဖြင့် ကျေးလက်ဒေသများသို့ သွားရောက် စည်းရုံးနေခြင်း ဖြစ်သည်။ တစည ပါတီမှ ယခုကဲ့သို့ စည်းရုံးရေး ဆင်းနေသော်လည်း ဒေသဆိုင်ရာ အာဏာပိုင်များက တစုံတရာ ဟန့်တားမူ မပြုလုပ်သည့် အပြင် ထောက်ခံ ပံ့ပိုးမူများကို ပြုလုပ်နေသည်ဟု သိရသည်။

ရခိုင်ပြည်နယ်တွင် တခြားနိုင်ငံရေး ပါတီများ၏ လူပ်ရှားမူမှာ မရှိသလောက် ဖြစ်ပြီး အများစု ရခိုင် နိုင်ငံရေး သမားများမှာ ရွှေးကောက်ပွဲ ဥပဒေနှင့် အမျိုသား ဒီမိုကရေစီ အဖွဲ့ချုပ်၏ ခြေလှမ်းကို စောင့်ကြည့်နေကြသည်ဟု သတင်းရရှိသည်။

ရင်းမြစ်..။နိရဉ္စရာ