တာဝန်မဲ့လွန်းသည့် သီရိလင်္ကာ မြန်မာသံရုံး။

သီရိလင်္ကာနိုင်ငံသည် ထေရ၀ါဒဗုဒ္ဓဘာသာ ထွန်းကားသည့်နိုင်ငံတစ်နိုင်ငံဆိုသည်မှာ ထေရ၀ါဒဗုဒ္ဓဘာသာ ကို လေ့လာထားကြပြီးသူတိုင်း သိပြီးဖြစ်သည်။ သီရိလင်္ကာနိုင်ငံသူ/သားများ၏ သာသနာ့ဝန်ထမ်း ရဟန်းသံဃာတော်များနှင့် ဘာသာရေးအပေါ်မှာ ရိုသေလေးစားမှုများမှာလည်း ဗုဒ္ဓဘာသာဝင်တိုင်း အတုယူစရာတစ်ခုပင်ဖြစ်လို့နေပါသည်။ သီရိလင်္ကာနိုင်ငံတွင်းမှာ နေထိုင်ပြီး စာပေသင်ကြားနေကြသည့် နိုင်ငံပေါင်းစုံမှ သာသနာ့ဝန်ထမ်းများအတွက် နေထိုင်ခွင့် ဗီဇာကို အခမဲ့ ဆောင်ရွက်ပေးနေခြင်းမှာလည်း ထိုနိုင်ငံ၏ ထေရ၀ါဒဗုဒ္ဓဘာသာ သာသာနာ၏ဂုဏ်ရောင်ကို ပိုပြီးတောက်ပြောင်စေသည်။

သီရိလင်္ကာနိုင်ငံအခြေစိုက် ပြည်ပနိုင်ငံကိုယ်စားပြုသည့် အခြားသောနိုင်ငံ သံရုံးများမှ သံရုံးဝန်ထမ်း (မြန်မာသံရုံးဝန်းထမ်းများမပါ) တို့မှာလည်း ဗုဒ္ဓဘာသာဝင် မဟုတ်ကြစေကာမူ ရဟန်းသံဃာတော်များကို ဦးစားပေးအလေးထားကြသည်ကို တွေ့မြင်ကြရသည်။ ယခုကဲ့သို့ ပညာရှိ သူတော်ကောင်းတို့၏ မြေပေါ်နေရာမျိုးမှာ နအဖစစ်အုပ်စုလို လူရိုင်းများ အုပ်ချုပ်သည့် မြန်မာနိုင်ငံမှ လာရောက်ပြီး တာဝန်ထမ်းဆောင်ကြသော သံရုံးမှ ၀န်ထမ်းပုဂ္ဂိုလ်များ၏ ရိုင်းစိုင်းသည့် အမူအရာများကား ကာယကံရှင်များကိုယ်တိုင်က မရှက်တတ်ပေမယ့် ရှက်တတ်သူများအဖို့ တွေးမကြည့်ဝံ့စရာပင်ဖြစ်သည်။

အဘယ့်ကြောင့်ဆိုသော် ၂၀၀၉ ခုနစ်ဝန်းကျင်မှ စ၍ ပတ်စ်ပို့ (အခြားနိုင်ငံသားများမြင်လျှင် နှာခေါင်းရှုံ့ခံနေရသော ) အဟောင်းများကို Electronic Scan သို့ ပြောင်းလဲရမည့် အခြေနေသို့ ရောက်ရှိခဲ့သည်မှာလည်း အများသိပင်ဖြစ်ပေသည်။ ဆိုလိုသည်ကား နိုင်ငံတကာရှိ Immigration များကို ဖြတ်သန်းသည့်အခါ အချိန်မကြာရအောင် ဆောင်ရွက်ပေးခြင်း ဖြစ်ပေသည်။

ပြည်ပတွင်နေထိုင်ကြသူများအနေဖြင့် နိုင်ငံကူးလက်မှတ်မှာ မရှိမဖြစ်ဖြစ်သည့်အတွက် သက်ဆိုင်ရာနိုင်ငံရှိ မြန်မာသံရုံးများအနေဖြင့် ဒေါ်လားစား၍ လုပ်ပေးသည်ဖြစ်စေ အခမဲ့လုပ်ပေးသည်ဖြစ်စေ သံရုံးနှင့်ဆက်သွယ်ပြီး ပတ်စ်ပို့သက်တမ်းတိုင်းခြင်း အသစ်လုပ်ခြင်း စသည်များကို လုပ်ဆောင်ကြရသည်။

ထိုသူများထဲမှာ သီရိလင်္ကာတွင် ပညာသင်ကြားနေကြသည့် စာသင်သားသံဃာတော်များလည်း အပါအ၀င်ဖြစ်သည်။ နှစ်ပေါင်းများစွာကတည်းက ပတ်စ်ပို့ သက်တမ်းတိုးသည့်ကိစ္စများကို အခမဲ့ဆောင်ရွက်ပေးခဲ့သော်လည်း ၂၀၁၀ နှစ်များအတွင်းမှာတော့ ပတ်စ်ပို့သက်တမ်းတိုးသည်နေရတွင် Electronic Scan အဖြစ်သို့ အသစ်ပြောင်းလဲ သတ်မှတ်ပြီး အခကြေးငွေအဖြစ် အမေရိကန်ဒေါ်လာ ၁၀၀ ကောက်ခံခဲ့သည်။ သို့သော်လည်း မြန်မာသံရုံးမှ ဒေါ်လာစားများ ပြုလုပ်ပေးသည့် E ပတ်စ်ပို့တော်တော်များများမှာ နိုင်ငံတကာရှိ immigration များဖြတ်သန်းသည့်အခါတွင် scan ဖတ်မရသည့် ပြဿနာများဖြင့် ရင်ဆိုင်ကြုံတွေ့နေကြရသည်။

ယင်းကဲ့သို့ အခက်ခဲပြဿနာများကို သံရုံးသို့သွား၍ တင်ပြသည့်အခါ ငွေမျက်နှာတစ်ခုကိုသာ ရှုတတ်သူများနည်းတူ တဖက်သူ၏ နောက်ဖြစ်လာသည့် အခက်ခဲများကို ဖြေရှင်းမပေးတော့ပဲ တာဝန်မဲ့သူတို့ ပြောဆိုလေ့ရှိသည့်စကားအတိုင်း ပြန်ပြောလေ့ရှိသည့်စကားမှာ “ဒါတွေက ပြဿနာ မရှိပါဘူး သုံးလို့ရပါတယ်” ဟု ပြန်ပြောပါသည်။ ယင်းလုပ်ရပ်များက မိမိတို့ကိုယ်မိမိ တာဝန်ရှိသူများအဖြစ် ခံယူထားပြီး တာဝန်ယူစိတ်မရှိသူ တာဝန်မဲ့သူများ၏ သရုပ်သကန်ကို မိမိတို့ကိုယ်တိုင် ဖော်ပြနေသည်။

ယင်းဖြစ်စဉ်ကြီးက မြန်မာနိုင်ငံ စစ်အစိုးရသက်တမ်းတစ်လျှောက်တွင် အထူးအဆန်းတော့ မဟုတ်ပါပေ။ စစ်ဘုရင် စစ်အဏာရှင်တို့၏ ကျင့်ဝတ်များစွာထဲက တစ်စိတ်မျှသာဖြစ်လေသည်။ နိုင်ငံတကာမှ လူယဉ်ကျေးတို့၏ စံနှုန်းသတ်မှတ်ချက် လူမှုဆက်ဆံရေးများကို စစ်အာဏာရှင်တို့၏ စနစ်အတွင်း သင်ကြားပြသပေးမှု ကိုယ်ပိုင်အသိစိတ်ဖြင့် ကြိုးစားမှုကင်းဆိတ်နေတာကြောင့် နိုင်ငံတကာလူအသိုင်းအ၀ိုင်းအတွင်းရှိ လူယဉ်ကျေးမှု စံနှုန်းတို့ဖြင့် တိုင်းတာသည့်အခါ အဝေးတစ်နေရာတွင်ပြတ်ကျန်ရစ်ခဲ့သည်ကို တွေ့မြင်ကြရသည်။ ယင်းကဲ့သို့ ပုဂ္ဂိလ်တို့အတွက် ကိုးကွယ်ရာဘာသာတစ်ခုသီးခြားမရှိပေ။ အာဏာရှိသူနဲ့ အာဏာရှင်တို့သည်သာ မိမိတို့၏ ကိုးကွယ်ရာအစ်အဖြစ် မှတ်ယူထားလေ့ရှိကြပေသည်။

နိုင်ငံကူးလက်မှတ်အဟောင်းမှ ခေတ်မှီ နိုင်ငံတကာအဆင့်မှီ နိုင်ငံကူးလက်မှတ်အဖြစ်သို့ ပြောင်းလဲပေးလိုက်သည် ဆိုသော်လည်း ဖော်ပြပါ ချွတ်ယွင်းချက်များကြောင့် ယခင်အဟောင်းနှင့် အသစ် ထူးခြားချက်ဆိုသည်မှာ အမေရိကန်ဒေါ်လာ ၁၀၀ ပေးရခြင်းမျှသာဖြစ်တော့သည်။ နိုင်ငံတကာရှိ မြန်မာသံရုံးများတွင် တာဝန်ထမ်းဆောင်ကြသူ မြန်မာသံဝန်ထမ်းများအကြား ဖြစ်စဉ်ကြီးတစ်ခုမှာလည်း မိမိတို့နိုင်ငံသား အခက်ခဲတွေ့ရှိပါက အကူအညီပေးဖိုိ့ထက် မြန်မာနိုင်ငံသား၏ သွေးနဲ့ ခြွေးနဲ့ ရင်းပြီးလုပ်ထားရသည့် လုပ်အားခထဲမှ ဘယ်လို ညှစ်ယူရမည်နည်း ဆိုသည်ကလည်း တစ်ခုအပါဝင်ဖြစ်လေသည်။ သီရိလင်္ကာတို့လို နိုင်ငံများတွင် တာဝန်ထမ်းဆောင်ရမည်ဟု အမိန့်ကျလာသည့်နေ့တွင် သံရုံးဝန်ထမ်းအချို့က ငါတော့ သွားပါပြီ ပိုက်ဆံမရနိုင်တဲ့ နေရာကို ရောက်ရပြီပေါ့ဟု ညဉ်းညူမှုတွေ ရှိခဲ့သည်ဟုလည်း ကြားရပါသည်။

အခကြေးငွေသတ်မှတ်လိုက်သည့်အတွက် ၄င်းတို့သတ်မှတ်ချက်များအတိုင်း တန်ရာတန်ကြေး ပေးပြီးပြန်သော်လည်း ကိစ္စတစ်ခုက လွယ်ကူစိတ်ချမ်းသာစွာ ပြီးစီးသွားသည်တော့မဟုတ်ပေ။ သံရုံးသို့ သံဃာများ သွားရောက်သည့်အခါများတွင်လည်း ၄င်းတို့၏ ဆက်ဆံရေးသည်ကား သီရိလင်္ကာနိုင်ငံသားတို့ မြင်ပါက ဤသံရုံးက ၀န်ထမ်းများသည် ဗုဒ္ဓဘာသာပါဟု ပြောပြပါ မည်သူယုံမည်မဟုတ်ပေ၊ အချိန်မကြာသင့်ပဲ အချိန်ကြန့်ကြာအောင်လုပ်ခြင်း အာဏာရှင်တို့ထုံးစံအတိုင်း အာဏာပညာပြခြင်းစသည့် ကိစ္စများကိုလည်း ရင်ဆိုင်ကြရလေ့ရှိတတ်ပါသေးသည်။

နိဂုံးချုပ်အနေဖြင့် စာရေးသူ၏ ဆန္ဒနှင့် ဖြစ်သင့်သည်မှာ ပတ်စ်ပို့များ scan ဖတ်မရသည့် ကိစ္စကို အချိန်မှီ ပြန်လည်ပြင်ဆင်ပေးရေးနှင့် ထေရ၀ါဒဗုဒ္ဓဘာသာ ထွန်းကားသည့်နိုင်ငံတွင် တာဝန်ထမ်းဆောင်နေသည့် ထေရ၀ါဒဗုဒ္ဓဘာသာအမည်ခံများအနေဖြင့် မိမိတို့နိုင်ငံရိုးရာနှင့် ဘာသာယဉ်ကျေးမှုများကို လက်တွေ့ကျင့်သုံးမှုဖြင့် ပြသကြဖို့ တိုက်တွန်းလိုက်ရပါသည်။

သောတုဇနဘိက္ခု။